Raparigos

Iste disco vai adicado ao Maestro Constantino Bellón, profesor de tantos e tantos gaiteiros, gaiteiro de tantas e tantas romarías, ao que nunca agradeceremos o que ten feito por nos. Raparigos O Noso agradecemento ao Profesor D. Pío Rodriguez Puga pola súa valiosa orientación pra arranar as súas obras e ao Artesán Antonio Corral polo seu apoio e bon facer. Encetamos esta nova serie de "Gaiteiros Galegos" co volumen adicado ao cuarteto tradicional "Raparigos", do Ferrol; suliñar a teima da serie de recoller as grabacións dos principais cuartetos e gaiteiros do país. Este grupo, formado no ano 1967, conta cún denso historial de actividades dende entón sendo quizaves ún dos cuartetos máis galardonados nos concursos de Gaitas do País. Entre outros teñen conquerido os seguintes premios: Lugo, 1968, 1º Premio; Santiago, 1969, 1º Premio; Santiago 1972, 2º Premio; Santiago 1974, 1º Premio; Lugo, 1974, 1º Premio; Ponteareas 1977, 1º Premio; Ponteareas 1989, 2º Premio. Amáis dos certames de gaitas e segundo a tradición do país, Raparigos estiveron presentes todos estes anos en innumerables festas e romaxes por Galicia e Asturias adiante. Teñen tamén participado en concertos e recitais coma nos Festivais Célticos de Pontevedra e Ortigueira do ano 1978, etc. O grupo ten colaborado, en conxunto ou algún dos seus músicos illadamente, con grabacións de outros músicos e agrupacións (Orfeón Terra A Nosa, Xavier Méndez, Emilio Cao) mais esta é a primeira grabación integramente súa. Nela téntase de recoller o máis representativo do seu estilo, característico das Mariñas, e do que pódese suliñar a súa sobriedade e rigurosidade interpretativas. A selección dos temas deste álbum resposta a un criterio de representatividade que poda interesar tanto ao estudioso da gaita como ao amante dos nosos temas tradicionais. No interior vai un folleto no que Raparigos xustifican o seu xeito de entender a música que interpretan e unha historia detallada do grupo. Con iste folletiño téntase facilitar aos interesados no tema información encol de aspectos da nosa música e dos nosos músicos non divulgados de coío.